Monday, July 15, 2013

කොස් !!!!!

              
මගේ ප්‍රියතම ආහාරයක් තමා කොස්....මොන ක්‍රමයට ඉව්වත් මනාපයි. එයින් කොස් තරුණ කාලෙ (young jackfruit)  පොලොස් කන්න බොහෝම මනාපයි. දැන් ඉතින් ඔය කට පුරා පොලොස් කිව්වට ගෙදරදි අපි කිව්වෙ පැහි කියල.. ඉස්කෝලෙදි යාළුවො හිනා උනා මගේ මේ පැහි කතාවට.. ඔය ඉතින් ඔහොම හිනා උන පළමු වතාවම නෙමේ.මම ඔය පුන්චි, පියාඹන කෘමී සත්තුන්ට කියන්නෙ "පූච්චො" කියල.. ගෙදර අයත් කියන වචනයක් ඕක. ඒත් ඉතින් මගේ යාළුවො ඕක අල්ලගන මාව කන්න හැදුව ඒකාලෙ.

                මම පාසල් ගියේ විනාඩි දහයක පහලවක දුරක තියන පාසලකට ඒක ප්‍රදේශයේ ප්‍රසිද්ධ පාසලක් නිසා හැම පැත්තෙන්ම ළමයි ආව .අපි හැමෝම අතර සුළු සුළු භාෂා වෙනස්කම් තිබුනට මහ ලොකුවට වෙනසක් දැනුනෙ නෑ. ඒකටත් එක්ක මම උසස් අධ්‍යාපනයට කොළඹට ආවම....අප්පේ...මාර වෙනස් සමහර වචන. මෙහෙත් ඉන්න සිංහල උදවිය වෙනස් පැතිවලින් ආපු අය. අපි ඉතින් සමහර වෙලේට ඔය වචන වෙනස ගැන කතාවෙනව.
          පිච්චුනාම එන දිය පට්ට වලට අපි කියන්නෙ පොක්කලම් කියල, ඒ වගේම කාඩ්බෝඩ්වලට අපි පට්ට කියනව,තව හිරිකඩ අපිට තුවානියන්..
           ඔය මගේ කටින් පිටවුන අමුතුම වචන විදියට එයාලට දැනුන ඒව. ආ.... ඉස්සර කැම්පස් එකේ ළමයි හිනාවෙනව" බස් හිටවනව" කියනවටත්. උන් අහනව උබල වලක් හාරලද හිටවන්නෙ කියල.

පිට පලාතකින් අපේ පැත්තට ඇවිත් පදිංචි උන ගුරුතුමියක් දවසක් අපිට මේ කතාව කිව්වෙ. මිස් බෞද්ධ ,අපේ ගම් පලාත්වල වැඩි ක‍තෝලිකයො.  දවසක් මිස් එයාගෙ හොඳම යාළුවෙකුගේ මරණෙකට සහභාගිවෙන්න යනගමන්ලු ඒයාගෙ ගමේ නෑදෑ අයියකෙනෙක් මගදි මුනගැහිල ඒ කෙනා අහල "නංගි මේ කොහේ යන ගමන්ද" කියල. මිස් කියල අනේ මම මේ මගේ යාළුවෙකුගෙ ඉලව් ගේක යනව අයියෙ කියල. ඉතින් අර මිස්ගෙ අයිය ඇහුවලු " ඈ නංගියේ ඒක මේ ආගමේ උත්සවයක්ද?" කියල...අපේ පැත්තෙ මළ ගෙවල් වලට කියන්නෙ ඉලව් ගෙවල් කියලනෙ.

කොස්.... කොස්... කොස් ගැන කතා කරන්න ඇවිත් අන්තිමට නැවතුනේ මළ ගෙවල් වලින්. ඒකෙත් ඉතින් එක අතකට ගැලපීමක් තියනව. මොකද මළ බතට දෙන්නෙත් කොස් තම්බල වට්ටක්කයි කරවල හොඳියි නෙ. මැයි, ජුනි කියන්නෙ ලංකාවෙ කොස් වාරෙ... ලංකාවෙ හිටියනම් ඉද හිටවත් කන්න තිබුන, එක එක ක්‍රමයට කොස්.
කොස් කන්න ක්‍රමනම් කීයක්ද. හොඳ හැටි බඩ පුරවගන්නත් ලැබෙනව. නිකමට යැ බත් ගහ කියන්නෙ. අපිට නම් තනිකර කොස් තම්බල බත් වෙනුවට කන්න තරම් කොස් ලැබෙන්නෙ නෑ. ගෙදර ගහක් දෙකක් තිබුන ඒත් කඩාගන්න කෙනෙක් නෑනෙ. ඉතින් කොස් ලැබෙන්නෙ ව්‍යාංජනයක් විදියට තමා. වරක නම් ගෙඩි වැටෙනව. ඒත්  මදුළු දහයයි වැඩිම. ගොඩක් කෑවම මැරෙනව කියල බයකරනව පොඩිකාලෙ. ඔහොම වරක වැඩියෙ කන්න නොදීපු දවසක මම "අකාල මරණයි කාල මරණයි දෙකක් තියනව... කාල මැරෙන එක හොන්දයිනෙ" කියල හොඳටෝම බැනුම් ඇහුව

                .කොස් වලට කියන තවත් නමක් තමා හෙරලි. ඔය නම හැදුන හැටි ගැන පුංචි කාලෙ මම කතාවක් අහල තියනව. හරියටම මතක නැතත් කතාව මෙන්න මෙහෙමයි..
            බොහොම ඈත කාලෙ කොස් කෑමට ගන්නෙ නෑලු. ඔහේ හැදිල වැටිල කුණු වෙලා යනවලු. ඒත් ඉතින් හැම තැනම හැදෙනවලු සරු සාරෙට. එක ගමක හිටියලු ගම ජෝඩුවක් බොහෝම දුප්පත් .. සමහර දවසකට ඉතින් කන්න ගේ හැරියෙ හාල් ඇටයක් නෑලු. ඔන්න ඔය වගේ දවසක ගම හාමිනේ දෝත් මුදුන් තියල දෙයියන්ට කන්නලව් කලාලු   "ඇයි දෙයියනේ අපේ දුක ඔබ තුමාන්ලාටවත් පේන්නෙ නැද්දෝ " කියල. ඔය කන්නලව්වට සක්‍ර දේවේන්ද්‍රයගේ පඬුපුල් ආසනේ රත් උනාලු (දැන් ඒ ආසනේ සක්‍ර දෙයියන්ගේ බිසව උයන්න හොට් ප්ලේට් එකට අරගන නිසා සක්‍ර දෙවියන්ට බුරුත ලීයෙන් හදපු කුෂන් පු‍ටුවක් ගෙනත් දීල ලු ).
 ඉතින් සක්‍ර දෙයියොත් මනු ලොවට වැඩල හිඟන්නෙක්ගෙ වෙස් අරගන ගියාලු මේ ගම ගෙට. යන කොටම පේනවලු කොස් ගස් හැදිල තියන හැටි අපූරුවට. සක්‍ර දේවයත් හිතින් හිතනවලු මේ මනුස්ස ලෝකෙ මිනිස්සු මේ ගස් තියාගන බඩ ගින්නෙ දුක් විදින්නෙ මොන මෝඩකමකටද කියල.
 හිඟන වෙස් ගත්ත සක්‍ර දෙයියො අර ගෙදරට ඇවිත් අනේ හාමිනේ මම මේ බොහොම දුරක හිට එන්නෙ කන්න මුකුත් දුන්නොත් පින් අත්වෙයි කියල කිව්වලු. ගම හාමිනේ ඉතින් අපිටත් කන්න නැති වෙලේ මේ මනුස්සයත් පාත් උනා මෙතෙන්ට කියල හිතමින් කිව්වලු 'අපටත් අද කන්න දෙයක් නෑ රාළේ ' කියල. සක්‍රයත් ඉතින් ඇවිදගෙන ගිහින් කොස් ගෙඩියක් කඩාගෙන ඇවිත් කිව්වලු 'අනේ හාමිනේ මෙන්න මේක කපල මදේ තම්බල දුන්නනම්' කියල. 'අනේ අප්පේ මේව කන්නෙ නෑනෙ' කියල ගම හාමිනේ කිව්වත් මනුස්සයගෙ කරදරේට ඔන්න කී හැටියට කලා කියමුකො. ඔන්න ටික වෙලාවකින් එනවලු හොඳ සුවදක්....ගම හාමිනේටත් දැන් ඉවසුමක් නෑලු මේකෙන් ටිකක් රස බලන්න. ඒත් ඉතින් සක්‍රයා ත තැවම කිව්වෙ නෑලු තම්බල ඇති කියල.ඉතින් ගම හාමිනේ හොරෙන්ම බාගෙට තැම්බුනු කොස් මඳුළු වල රස බැලුවලු. ඕක දැක්කක සක්‍රයා මේ ගස "හෙර ලිය" කියල නම්කලාලු... කටින් කට යනකොට ඒක නිකන්ම හෙරලි උනා කියල තමා මම දන්න කතන්දරේ.

          දැන් මෙහෙම කොස් නෑ කියල නහයෙන් ඇඬුවට අපිත් ඉද හිට කනව ටින් කරපු පොලොස් සහ ශීත කල කොස්.. කොච්චර උත්සහ කලත් ගෙදර උයන රස එන්නෙ නැත්තෙ මගේ අවුලක් ද කොස් වල අවුලක් ද මන්ද. මෙහේ තියන ආසියානු වෙළඳසැල් වල ඔය පොලොස් ටින් ගන්න පුලුවන්. මම ඉතින් ලැබෙන වෙලාවට දහයක් විතර ගෙනත් තියාගන්නව. ඹබර කුමාරය කියන්නෙනම් මම පොළොස් මැල්ලුම වගේ එකක් හදනව කියලයි. අනේ උන්දල දන්න ඉවිලි.
 පොලොස්  කියන්නෙ බඹර කුමාරයගෙත් ටොප් ටෙන් චාර්ට් එකේ කෑමක්. විවාහ වෙන්න කලින් ඔය පොලොස් කතාවක් ඇදිල ආවම මෙන්න මෙයා කියනව එයාලගෙ ආච්චිලාගෙ ගෙදර තියනවලු පොළොස් ගහක්! මම ඉතින් දැන් දස අතේ කියනව එහෙම පොලොස් ගස් නෑ කොස් ගස්ම තමා තියෙන්නෙ පොලොස් කියන්නෙ කොස් වල ලපටි කාලෙ කියල.කෝ.. මෙයා දැන් පිලිගන්නෙම නෑ. ගහ තියන තැනත් කියනව...මාත් ඉතින් බැරි තැන අත ඇරිය.
 කලකට පස්සෙ මම විවාහ උනාම මට ඕන උනා ඔය කියන අරුම පුදුම "පොලොස් ගහ"  බලන්න. ඔන්න ඉතින් ආච්චිලාගෙ ගෙදරත් ගියා කියමුකො. කියපු තැන කියපු විදියටම ගහක් තියනව..........හැබැයි "දෙල් ගහක්"!

24 comments:

  1. //කියපු තැන කියපු විදියටම ගහක් තියනව..........හැබැයි "දෙල් ගහක්"!//

    හැක්Z!!!

    ReplyDelete
    Replies
    1. මටත් ඒක දැකල හොඳටම හිනා ගියා.:)

      Delete
  2. හප්පා එහෙමත් කියනව නේන්නං.. දෙල් ගහට.. ඔය කොස් ගැන අපේ හිරු ළමයත් හොද කතාවක් පවත්වල තිබුනා.. බැලුවනං හෙම හොදා..

    ReplyDelete
    Replies
    1. ඔන්න ඉතින් තමන්ගෙ කට්ටිය බේරගන්න බොරුත් කියනව.. (කොයි රටේද ඔය දෙල් ගහල පොලොස් ගහ කියන්නෙ ... හී හී). ඔන්න දුවල ගිහින් බැලුව.ලියල නේන්නම් හිරුව පෝස්ට් එකක් පින්තූරත් එක්ක.

      Delete
  3. ඹබර nemyi lamayo බඹර :D

    oya polos tin wath nathnam mamanam melahakata mehen gihin. mageth priyathama kamak thamai polos. oya kiwwa wage kohoma karath gedara rasanam enne naha. shitha kala kos nam apita hoyaganna naha.

    ReplyDelete
    Replies
    1. හප්පේ ඔව් නේන්නම්.. මම මේක කීප පාරක් කියවලත් දක්කෙ නෑනෙ. ඔන්න හැදුව. මමනම් කියන්නෙ සයුරි ඕක ඔය ටින් එකේ වැ‍රැද්ද... නැත්නම් මම අහන්නෙ මේතරම් රසට උයන අපිට බැරිවෙන්න බෑනෙ නේද( හිකිස්!) . කොස් මදුලු පැකට් ඉද හිට ලැබෙනව..ඔය තායි කඩවල තමා තියෙන්නෙ.ඇයි සයුරි කෙසෙල්මුව ටින් එක.. හම්මේ.. මේ ටින් නැත්නම් අපිත් බඩ ගින්නෙ.

      Delete
  4. කතා කීපයක්ම තියෙනවා නේද ..මම නම් බොහෝම මනාප කිරිකොස් කන්න තමයි..ගොඩක් කාලෙකින් කන්න ලැබිලා නැහැ...රසවත් පෝස්ට් එකක්..දිගටම ලියන්න රෝස කුමාරි..

    (මෙන්න මෙහෙම කමෙන්ට් එකක් ස්පෑම් ගොඩේ තියෙනවද බලන්න රෝස කුමාරි..)

    ReplyDelete
    Replies
    1. ඔව් නේන්නම් ස්පෑම් එකේ තියනව :) . ස්තූතියි දිරි ගැන්වීමට

      Delete
  5. කොස් මගෙත් ප්‍රිය කෑමක් . මහේ උන් වැඩිය නොකන නිසා විකුණන්න නැහැ . වරක විතරක් විකුණනවා. පැසුණු කොස් නම් සොයා ගන්නම නැහැ . බල්ලෝ බළල්ලු කන වෙලාවේ කොස් කන්න ඉගෙන නොගත්තේ ශක්‍රයා මෙහ නැතුවද මන්දා .

    පොලොස් ගහ = දෙල් .දවසේ කතාව .

    ඔයා කියන්නේ අපේ උන්දගෙත් ගහ කොළ සතුන් ගැන දැනුම ඉස්තරම් .

    ReplyDelete
    Replies
    1. ෂුවර් එකටම සක්‍රයාට වියට්නාම් බස බැරුව ඇති ! ලංකාවෙන් එනකොට අ‍ටු කොස් එහෙම ගෙනාවෙ නැද්ද(කිව්වට මොකද මම ඔය අ‍ටු කොස් කාලම නෑනෙ).
      මහත්තුරුන්ට තියන ලෙඩක් මම හිතන්නෙ. මම මේ බයේ ඉන්නෙ ලංකාවට ආපු දවසක එළවළුවක් ගන්න කඩේ අරින්නෙ කොහොමද කියල. මොනා උස්සන් එයිද දන්නෙ නෑනෙ.

      Delete
  6. අම්මෝ...කොස්??? මට දැනුත් බඩිගින්නක් ආවා!!! :(

    සුභ වේවා!!! රාජ සම්පත් ලැබේවා!!!

    ReplyDelete
    Replies
    1. සුභ වේවා!! රාජ සම්පත් ලැබේවා !!! :)

      Delete
  7. //කියපු තැන කියපු විදියටම ගහක් තියනව..........හැබැයි "දෙල් ගහක්"!//
    :D:D:D

    ReplyDelete
    Replies
    1. කියල වැඩක් නෑ පොඩ්ඩි මටත් හිනා ගියා හොඳටම ගහ දැක්කම....

      Delete
  8. කොස් වගේම රසවත් පෝස්ට් එකක්. රෝස කුමාරි, මම මේ පොක්කාලම වගේ වචන ගැන ගෙදර අයට කියලා එයාලා අහනවා කොයි පළාතෙද එහෙම කියන්නේ කියලා. කොයි පළාතෙද ඇත්තටම එහෙම කියන්නේ? මමත් ඔය ඩයලෙක්ට් ගැන උනන්දුයි.

    ReplyDelete
    Replies
    1. දන්න තරමින් මීගමුව හා හලාවත අතර ප්‍රදේශයේ තමා ඔය වචනෙ භාවිත වෙන්නෙ.

      Delete
    2. මේ වචන සහ උච්චාරන වෙනස්කම් වලින් පැහැදිලි වෙන්නේ ලංකාවේ සංක්‍රමනික ඉතිහාසයයි.

      Delete
  9. කොස් ගැන වගේම භාශා භාවිතය ගැනත් හොඳ පෝස්ට් එකක්. අන්තිමට කොස් දෙල් මාරු වුණ කතාවෙන් මතක් වුනේ, මමත් හරි ආසයි දෙල් බැදලා සීනි දාලා කන්න.

    අපේ පැත්තෙත් අපිටම ආවේනීක වුණ භාශා රටාවල් තියනවා. ඔය පොක්කලමත් අපේ පැත්තේ භාවිතා වෙනවා, ඒ වගේම මුහුදු රැල්ලට මාරියාව කියනවා.

    ReplyDelete
    Replies
    1. දෙල් බැදල මාත් ආසම කෑමක්! මාරියාව කියන්නෙ ටිකක් තද මුහුදු ‍රැල්ලට නේද?

      Delete
    2. තදම වෙන්න ඕන නෑ. සාමාන්‍ය රැල්ලටත් මාරියාව කියනවා. උදාහරණ හැටියට "අද නම් මාරියා ගහන්නෑ", "අද මාරියාව ටිකක් විතර සැරයි" ගන්න පුළුවන්.

      Delete
  10. කොස් දෙල් පටලගත්තු එක නොවැ පුදුමේ :D

    ReplyDelete
  11. බඹර කුමාරයා කොස් ගැන දන්නේ නැති වුනාට කොස් කිරන්න නම් දන්නවා ඇති නේද?

    ReplyDelete
  12. ප්‍රිය ඇඩ්මින් වෙත,

    ඔබේ බ්ලොග් අඩවියත් විකසිත සින්ඩියට එක්කර ගන්න. (Blog Syndicator)
    Blogger සහ WordPress බ්ලොග් අඩවි සදහා එම අඩවියේ URL එක සහ බ්ලොග් එකෙහි නම ලබාදුන් සැනින් ස්වයංක්‍රියව සින්ඩිය හා ඇමුණුම සිදුවේ.
    බ්ලොග් නොවන නමුත් Feeds සක්‍රිය වෙබ් අඩවි වුවද සින්ඩිය හා ඇමිණිය හැකිය.
    විකසිත සින්ඩිය :- http://www.syndi.wikasitha.com/

    මිට හිතාදර
    ඇඩ්මින් - විකසිත සින්ඩිය. (info@vweb.lk)

    ReplyDelete